गोतीर्थकानामस्माकं गोतीर्थे (Oxford) समाजोऽस्ति गोतीर्थकसंस्कृतसमाज इति । अद्य प्रीत्या तत्सदस्या विज्ञापयामो यदिदं वयं मृच्छकटिकं नाम प्रकरणं प्रायौक्ष्म । नाटकविटपिवने प्रकरणतरुमारुह्य रसार्द्रमेव धीरप्रशांतकस्य वृत्तफलमवचित्य निष्पीड्याञ्जलिपुटे तत्परिणाममाधायास्वादार्थं युष्माकमुपढौकयामश्चेति । कथं हि प्रकरणस्य प्रसिद्धत्वेन नानाभाषकत्वेन शृङ्गारहास्यादिरसानुकूलत्वेनापूर्वत्वेन च न चमत्करणकारणत्वं सिद्ध्यति । न केवलं पुनरत्र चमत्कृतिरेव लाभोऽभिप्रेतः, यावद्देववाण्याः स्वप्रतिपत्तिपरप्रतिपादनार्थमप्येतद्व्यवसितमस्माभिः । अतो लक्ष्यद्वयं लक्षयित्वा कार्यस्य दुःसाध्यतां च दोषोत्तरमपि मृग्यगुणमपि प्रयोगं मोपेक्षध्वमिति प्रार्थयामः । किंबहुना यद्यप्यत्र द्वाभ्यामेव होराभ्यां संविधानकमवस्यति, तथापि नवनवोन्मेषशालिभिर्दशभिरङ्कै रमणीयरामावतारैरिव प्रसाद्यमानानां तन्नन्दनैः कुशीलवैराराध्यमानानां चतुर्भुजे रङ्गे चतुर्भुजस्येवाङ्के दोलायमानानां कथमेतन्न पार्षदानां परमानन्दाय स्यात् । अतो वयं पुनरेव करुणारुणाक्षा उत्साहयामो वोऽमुमारम्भं द्रष्टुमनुभूतं च व्यवहर्तुम् । भविष्यन्त्यां च संसदि संनिहिता भवतेति चरमा नः प्रार्थना ।